Hamazazpigarren aldiz Everesteko tontorrean, errekorra!!

Appa sherpak Everest mendiaren tontorrera hamazazpigarren aldiz heltzea lortu du gaur, eta hura da hara gehien igo dena. Munduko mendirik garaiena da Everest (8.848 metro).

Gaur goizean zapaldu du gailurra Appak, beste bost sherpekin batera, Nepalgo Turismo Bulegoak esan duenez. 46 urte dauzka.

Chewang Nima sherpa da Everesteko tontor gehien egin duen bigarren mendizalea, hamalau igoerekin. Hirugarren, beste sherpa bat: Lhakpa Ghelu, hamahirurekin (gaur egin du azkena).

Ricardo Valencia hil da elur-jausi batek harrapatuta

Ricardo Valencia mendizale nafarra Daulaghiri mendian hil zen igande honetan elur-jausi batek harrapatu ondoren. Ricardo Valenciarekin batera Santi Sagaste aragoiarra ere hil zen.

Ricardo Valenciak 47 urte zituen, Iruñan jaioa zen eta Salinas de Ibargoitin bizi zen, eta aurrez, Cho Oyu, Gashembrum eta Manaslu mendiak igoak zituen.

Aragoiko Gobernuaren ordezkaritzak informatu duenez, mendizale bien hilotzak aberriratzeko izapideak hasi dituzte, dagoeneko, baina atzo beste elur jauzi bat izan zen istriouaren lekuan, eta oraingoz gorpuen erreskatea ezinezko bilakatu da.

Zorionak Anaitasuna elkarteari!!

Iruñeko Anaitasuna elkartearen mendi saila, duela 50 urte sortu zen, 1957ko apirilaren 15ean hain zuzen ere. Baita ere 20. aldia da Pirineotako zeharkaldia egiten dutela, hori ere ospagai dute urte honetan bertan. Aurten ere kantabriar itsasoa eta mediterraniarra lotzen dituen zeharkaldia egiteko asmoa dute eta besteei parte hartzeko aukera ere luzatu dute.
Etapak honako hauek izango dira:
Uztailak 9-14: Hendaia-Otsagabia.
Uztailak 15-22: Larrau-Canal Roya.
Uztailak 22-29: Canal Roya-Parzango Ospitalea.
Uztailak 29-Abuztuak 5: Parzango Ospitalea-Artieseko kanpina.
Abuztuak 5-12: Artieseko kanpina-Pla de Rat.
Abuztuak 12-19: Pla de Rat-Ull de Ter.
Abuztuak 19-26: Ull de Ter-Port Bou.

Zeharkaldirako izen emateko epea iada zabalik dago, argibide gehiago behar izan ezkero eta apuntatzeko hemen dijoakizue telefonoa: 948-25-49-00.

Irudi ikusgarriak!

Edurne Pasaban Annapurnan

Edurne Pasaban iada Annapurna mendia igotzeko saiakeran dago. Iada 2. kanpamentura iritsi dira espedizioko mendizaleak arazo handirik gabe. Kanpamentu hau 5.500m-tara dago. Hurrengo egunetan 3.kanpamentura iristeko saiakera egingo dute, akaso igoeraren zatirik zailena eta Edurneren hitzetan, "taldeak errespetu handia gordetzen dio tramu honi".

Everest mendira egindako irteera izugarria!

Discovery Channel kateak, Everest mendira egindako igoera baten dokumentala argitaratu berri du. Dokumental honek, 11 mendizalek (bat bera ere ez profesionala) munduko mendirik altuenaren gaina harrapatzeko saiakuntza erakusten digu. Mendizale hauek, Russel Brice, Zelanda Berriko mendizale famatuaren gidapean jardungo dute.

Berezitasun handi bat ere badauka irteera honek, lehen aldiz behar bereziak dituen pertsona bat munduko puntara igoko bait da. Mark Inglis, olinpiar jokuetan domina irabazitakoa da, beraz mundu horretan ezaguna, baina bi hankak moztuak ditu Cook mendian(Zelanda Berria) izan zuen istripu baten ondorioz eta protesien bitartez egin du aurrera abentura gogor eta polit honetan.

Tira bira guztiak argitu gabe, esan dokumental hau aipatutako kate honetan izango dela apirilaren 18tik aurrera, asteazkenero gaueko 23:10 etan hasita. Aukera duzuenok ikusi eta ez dugunok bideoan edo ikustearekin konformatu beharko dugu.

Amorebietako gazte bat zendu da Ori mendian.

Igande arratsaldean galdu zen, eta astelehen goizean hilik aurkitu zuten. Sever Uriarte, Zornotzako 28 urteko mendizalea, Ori mendiko gailurretik 200 metro ingurura topatu zuten Guardia Zibilaren mendiko taldeko kideek, Nafarroako Pirinioetan. Beste hainbat lagunekin joan zen, mendiaz gozatzera.

Igande arratsaldean piztu zen alarma Nafarroako Larrialdietarako Agentziaren egoitzan, 19:45 aldera. Beste lau lagunekin zihoan mendizale bat galdu egin zela jakin zuten han. Zergatik ez dakitela, taldetik urrundu egin omen zen gazte bizkaitarra. Bakarrik gelditu, eta galdu egin zen.
Nafarroako Larrialdietarako Agentziak martxan jarri zuen, abisua jaso eta berehala, gizona bilatzeko operazioa. Iruñeko, Aurizko eta Nabaskozeko suhiltzaleak aritu ziren lanean, batetik, eta, haiekin batera, Guardia Zibilaren mendiko taldeko kideak, eta Pirinioez bestaldeko salbamendu talde bat, bestetik.

Nafarroako Gobernuaren helikopteroa atera zen, halaber, mendizalearen bila. Igandean, ordea, helikopteroaren eta gainontzeko talde guztien ahalegin guztiak hutsalak izan ziren. Ez zuten gaztearen arrastorik aurkitu mendian.

Asteleheneko, goizean goiz ekin zioten berriz lanari, eta 09:30 aldera topatu zuten gizona, hilik. Ori mendiko gailurretik 200 metro ingurura zegoen 28 urteko gaztearen gorpua.
Guardia Zibilaren mendiko taldeko kideek jaso zuten mendizalearen hilotza. Ospitalera eraman zuten, zer gertatu zen argitzeko autopsia egitera.